Filter

Kombilər


Kombi nədir?


Kombi (İngiliscə combined – birləşmiş) kiçik qapalı məkanlar üçün istilik və isti su ehtiyacını qarşılayan qızdırıcı cihazdır. Son zamanlar populyarlaşmasının səbəbləri arasında divara quraşdırılması, yüngül olması, az yer tutması və səssiz işləməsini göstərmək mümkündür.

Kombi alarkən nəyə diqqət etməliyəm?

Kombi alarkən bir çox amili nəzərə almalısınız. Bunlar, kombinin növü, kombinin brendi, kombinin əsas xüsusiyyətləri, məkanın əsas xüsusiyyətləridir.


Kombiləri 4 qrupa ayırmaq olar:


1.Bacalı kombilər

 Daxili məkandan hava alan və yanma nəticəsində yaranan tullantı qazı bacadan çölə atan qızdırıcı cihazdır. Bina və ya ev bacalarına qoşulur, amma bacaların standartlara uyğun olması və ventilyasiya sisteminin yaxşı işləməsi lazımdır. Bacalı kombilərin fırtınalı havada zəhərli qazı içəri vurma ehtimalı yüksəkdir.

 2. Hermetik kombilər (konvansiyonel/adi kombilər)

Ventilyator vasitəsilə xaricdən hava alan və tullantı qazı çölə atan qızdırıcı cihazdır. Hermetik kombinin bacası birbaşa çölə çıxır, bina bacasına qoşulmur. Daxili havadan istifadə etmədiyinə görə ventilyasiya sisteminə ehtiyac yoxdur. Bundan başqa, hermetik kombilər hava amillərindən təsirlənmədiyinə görə daha təhlükəsizdir. 


3. Yoğuşmalı kombilər (kondensasiyalı kombilər)

Yanma nəticəsində ortaya çıxan tullantı qazı çölə atmır, qazdakı su buxarını enerjiyə çevirib təkrar istifadə edərək enerjiyə qənaət edir. Enerjisini aldığı buxarı su olaraq çölə atır. Digər kombilərlə müqayisədə yoğuşmalı kombilərdən istifadə enerjiyə qənaət baxımından daha sərfəlidir.

4. Elektrikli kombilər

Bacası olmayan və elektriklə işləyən qızıdırıcı cihazdır. Elektrikli kombilərin tullantı qaz sistemi və zəhərlənmə kimi riskləri olmasa da, yanacaq sərfiyyatı qaz modellərinə görə daha yüksəkdir.


Kombi Brendləri (kombi markaları)


İlk öncə kombi dedikdə İtaliya istehsalı kombi brendləri yada düşür. Bunlardan – İmmergas, İtaltherm, Radiant, Ferroli, Biasi, Navien, Ariston, Simme və s. kombilərin adını çəkmək olar. Bu məhsullara standart olaraq 2 il zəmanət verilir. Satış təcrübəsinə əsasən, İtaliya istehsalı kombilər rahat 10 il problemsiz işləyir. İtaliya istehsalı kombilərlə yanaşı, Almaniya istehsalı kombilərdən Protherm-in adını çəkmək olar, həmçinin bazarda ən çox güvənilən orta qiymətə olan Türkiyə istehsalı kombiləri də vurğulamaq lazımdır. İlk öncə ECA kombi, Warmhaus kombi, Baymak kombi, Sanica kombi, Demirdöküm kombini və s. misal çəkmək olar. Bu kombilərdən ECA kombi özünü ən çox doğrultmuş kombilərdəndir. Bu minvalla da ECA kombi məhsullarına 3 il ödənişsiz zəmanət verilir. Üçüncü qisim nisbətən aşağı qiymətə olan kombilərdən Çin istehsalı markaları vurğulamaq lazımdır. Bunlardan Caldo kombi, Comfort kombi, Optimal kombi, Termogas kombini misal göstərmək olar.

Kombinin əsas xüsusiyyətləri 

Kombi alarkən cihazın əsas xüsusiyyətlərinə diqqət yetirmək lazımdır. Bura kombinin tutumu, gücü, cihazın TSE, CE və ISO 9002 kimi sertifikatları, yanacağa qənaət xüsusiyyəti daxildir.

Kombi qazanları tutumlarına görə 20000 kkal/saat, 26000 kkal/saat və 30000 kkal/saata bölünür. Bu təsnifata əlavə olaraq, kombi brendləri tərəfindən təklif olunan ara güclər də var. Kombinin təklif etdiyi bu güclər almaq istədiyiniz kombinin evi və ya ofisi qızdırmaq üçün kifayət qədər gücü olub-olmadığını göstərir.

Bundan əlavə, alacağınız kombi ilə bağlı istifadəçi şikayət və rəylərini nəzərdən keçirin. Firmaların verdikləri zəmanətləri və sertifikatları yoxlayın. Kombinin yanacaq sərfiyyatı xüsusiyyətinə diqqət yetirin.


Məkanın əsas xüsusiyyətləri

Kombi qazanı seçərkən məkanın xüsusiyyətlərini nəzərə almaq lazımdır.  Bura kombidən istifadə edəcəyiniz ərazinin kvadrat metri, onun izolyasiyası, evin və ya ofisin istiqaməti daxildir. Bu amillərlə siz kombinin tutumunu tapa və özünüz üçün ən uyğun kombi seçə bilərsiz.

Kombi istifadə edəcəyiniz sahənin kvadrat metrinə görə aşağıdakı kimi təsnif edilir.

  • 160 kvadratmetrə qədər: 20.000 kkal/saat
  • 200 kvadratmetrə qədər: 26.000 kkal/saat
  • 200 kvadratmetr və yuxarı: 30.000 kkal/saat

Eviniz yuxarı və ya aşağı mərtəbədədirsə, şimala baxırsa və ya izolyasiya olunmayıbsa, peşəkar məsləhər istəməli ola bilərsiniz.

Niyə kombiyə üstünlük verilir?

  • Həm istilik, həm də isti su ehtiyacını təmin edir;
  • Mərkəzi sistemə bağlı deyil;
  • Quraşdırlması, nəzarəti,təmizlənməsi asandır;
  • Az yer tutur və səssiz işləyir;
  • Ekolojikdir.

Tez-tez verilən suallar:

Kombi qazanlarının qiyməti  yüksəkdir?

Kombi qazanlarının ilkin investisiya xərcləri yüksək görünsə də, uzunömürlülüyünə və yanacaq sərfiyyatına görə bahalı cihazlar deyil.

Kondensasiyalı (yoğuşmalı) kombilər hər evdə istifadə oluna bilər?

Kondensasiyalı kombilərdə istifadə olunan hissələr digər kombilərə nisbətən bahadır və sistemdə istifadə olunan suyun temperaturu aşağı temperaturda (50-30 C) olmalıdır. Buna görə daha çox radiator istifadə edilməlidir. Bu o deməkdir ki, sistemin quraşdırılması daha bahalıdır. Bu tip cihazlara yalnız yeraltı istilik sistemləri üçün üstünlük verilə bilər.

Kombi qoyduğum yerdə balkonu bağlamaq lazımdır?

Kombiləri açıq balkona qoymaq olmaz. Balkonu ya tamamilə, ya da cihazın yerləşdiyi yeri bağlamaq lazımdır.

Kombini daim açıq saxlamaq kombiyə ziyan vurur?

Avtomatik idarəetmə panelindən gecə və gündüz temperaturunu tənzimləməklə kombiləri 24 saat işlək saxlaya bilərsiniz.

Kombidən necə qənaətlə istifadə edə bilərəm

Kombini qısa müddətdə yandırıb-söndürmək və bu prosesin dəfələrlə təkrarlanması, həm daha çox yanacaq sərfiyyatına, həm də cihazın ömrünün azalmasına səbəb ola bilər. Bunun əvəzinə kombini davamlı olaraq aşağı rejimdə işlətmək daha az yanacaq sərfiyyatı təmin edəcək.

Kombidən qənaətlə istifadə etmək üçün radiatorları söndürmək düzgündür?

Kombilərdə su fasiləsiz nasos vasitəsi ilə verilir. Bu nasosun səmərəli işləməsi üçün ən azı 3 radiator işləməlidir. Əks halda nasos xarab ola bilər.

Kombi alarkən zəmanət verilir?

Hər bir kombi markası üçün standart zəmanət müddəti 2 ildir. Alacağınız kombinin zəmanət müddəti kombi şirkətlərinin tətbiq etdiyi müxtəlif üsullarla 20 ilə qədər artırıla bilər. Bundan əlavə, zəmanətdən sonrakı xidmət də vacibdir.

Kombilərin orta ömrü nə qədərdir?

Kombi qazanlarının orta istismar müddəti; Təmir vaxtında və səlahiyyətli servis tərəfindən aparıldıqda təxminən 15 il olur.